Syndication04 Sep 2008 - 14:26:32
Tramandera - TITO
Tramandera
O Corsu di fede sincera
Stu scrittu ne ferà testimoniu
Da sparte cun tè a mio spera
D’arribbiccà l’avvene in sonniu
Incenderà a tramandera,
A sorte di u patrimoniu.
Disciupliccheghja a to paghjella
Intunata cun fracassu
Aghjusta a terza la più bella
Dopu à a seconda eppo u bassu
Da quellu cantu chì scanella
Seguiteremu tandu lu chjassu.
Sceglilu puru lu to versu
Basta ch’ellu sia spartutu
Illumineghja lu più scarsu
Lu sminticatu o scunnesciutu
Canta chì nunda ùn sia persu
Canta chì nimu ùn stia mutu.
E to fole falle corre
Puru di ghjornu è senza focu
Disceta a veghja chì si more
E ch’ùn si vede più indocu.
A veghja ne serà stu fiore
Chì radicheghja omi è locu.
O Corsu facciu preghera
Teni bè quest’andatura
Mettici puru a manera
Appii sempre stessa primura
Per mughjà à a terra intera
Ch’hè sempre viva a cultura.
Cet article n'a pas de Commentaire pour le moment...