Quandu si cambiata

Sè tù ti n'avveni la mio innamurata
Ne facemu noi prumesse sulenne
Ancu senza festa per quelle le strenne
La volsemu bella la nostra abbracciata
Ma oghje mi pare di sente e tintenne 
O Corsica mea quantu sì cambiata

Sè tù t'arricordi di quella sbarcata
Colmi di sperenza è di l'allegria
C'era in core à noi cume diceria
Un rispiru novu d'una sventulata
Mi parenu oghje tutte niscentrie
O Corsica mea quantu sì cambiata

U paese hè spentu da la spenserata
A Campagna hè guasta da u lasciacorre
A cità chì ride di lu so rimore
Ogni cosa cara la sentu sbandata
Hè ghjunta ammarezza in lu nostre amore
O Corsica mea quantu sì cambiata

Ma ùn'vogliu perde la sperenza amata
Mancu vogliu sente la to malacella
In mare turchinu una navicella
Mi fermerà in core di neve impannata
E'in la mio memoria ci luce la stella
Di Corsica mea ch'ùn hè mai cambiata