Syndication27 Fév 2009 - 11:00:07
L'altrò- TITO
L’altrò...
Di a mea l’estistenza
Induve camminu a socu
E a tesu di pacienzia
Chì u tempu ne hà pocu
Aspittend’a to prisenza
Ritruvà u nostru locu...
Chì serà stu locu quì
Ch’inseme emu inventatu
U ci vulemu definì
Cum’un locu sunniatu
Duve l’amor’ ùn pò smarì
E u campà n’hè beatu...
Hè locu duve e sponde
Sò di sta cunfine matta
Duv’a passione risponde
Quandu chì a chjam’ hè fatta
E ci correnu e stonde
L’una più bella chè l’altra...
Quallà sò pari l’avisi
Quantu chì ne speru eiu
Sò cusì chjari i visi
U piacè fiurisce megliu
E risplenden’ i surrisi
Prim’u toiu dopu u meiu...
L’emu fattu noi quessu
Incù e nostre pensate
E ci vultemu à spessu
In i sguardi sò l’entrate
Firmerà sempre listessu
L’ore ne sò stantarate...
Tandu dammi a to manu
E vultulemu a rasgiò
Un ti steraghju luntanu
Poc’impreme a stagiò
U « noi » ne serà suvranu
Partimu torna per l’Altrò...
Cet article n'a pas de Commentaire pour le moment...