Syndication26 Jul 2008 - 18:40:44
Cantu - Ghjuvan Terramu ROCCHI
Cantu
Ogni cosa m’intarga à mè u mischinellu
Da chì capu piglià l’infinitu ghjumellu ?
Chì serà minutame o di grande primura ?
Cernicernigliulà mi vene troppu dura
E cusì cantu a vita in viaghju
Cantu quantu n’aghju fiatu...
Cantu u fiuricellu in le magre purette
L’acellu migradore à toni è à saette
Primu stridu à u mondu di u mondu riparu
E pot i cantu à tè d’amore paru paru
E cusì cantu a vita in viaghju
Cantu quantu n’aghju fiatu...
Cantu u male stà, a fame ch’attanaglia
Vuciarella aghjuntata à vucione in battaglia
E po cantu da tè perchè si differente
Cantu cantu cantà cantà da facci sente
E cusì cantu a vita in viaghju
Cantu quantu n’aghju fiatu...
Cantu l’ora amarezza ad ogni porta chjosa
E to lotte e cantu a to sorte ritrosa
Dumane hà da spuntà u ghjornu preferitu
Dumane ai da campà è liberu è unitu
E cusì cantu a vita in viaghju
Cantu quantu n’aghju fiatu...
Cet article n'a pas de Commentaire pour le moment...